Dopaš kotor hertija
O pazletno mučimasko kamiono gelosastar; O gosto, jekh terno manuš con kali čipta pe peleria, phirelas kruglom ando kher mai jekh data te dikhel te na bisterda variso. Niči, či bisterda kanči, savsem kanči; kadia la ai gelo ando kalidori, vo korkoro kerdapeske zor te bistrel sa so naklo ande kado kher. Numa dikh, ando kalidori, paša telefono, bešelas jekh dopaš kotor hertija astardi;perdo
ramomos sas pelate katar butenge vas, uni ramomos kon černila, kaver kaver ramome karandašosa molivengo tai uni lole karandašosa. Kotse ramolas, antrego kača šukar historia, kai sas kerdi ande kadia skurto 2 beršengi vriama; Sa so vo kamelas te bistrel ramolas kotse; jekhe manušesko trajo pe jekh kotor hertija.La tele e hertija; Kudolatar hertija sas kai galbenisaili ando kam, kai strefial. Vo la tai toda la opral po bov, tai bandjilo čira opral pa bov tai lape te djinel. Pervo ramolaspe lako anav: Alice,
o mai šukar anav kai vo zjanelas, anda kudo ke leski piramni sas. Tai o numero—15 11. Miazolas ke jekh numero si anda khangeriako psalmo. Mai tele ramolas; Banko. Leski buči sas, e svinto buči, kai delas manro, o kher, e romni o fundamento sa le goresko. Numa kudo ramomos sas opral koslo! Ke o banko pelo, numa čindales kaver banko, pala jekh vriama ando but nekazo.Atunči avilo kako divano.
O luludjari tai o vurdongrastesko. Kudo sas o manglimos, Pe kudia vriama leske posoča sas pherdo love.Pala kudo: o gazjo le mueblongo, o manuš kai tol špaleria: Mučilpe. E kantora express: von mučinpe andre.E kontora la operaki:50 50. Von akana so ansurisaile tai zjan pe opera kurke. Lenge
mai laše vremi kai sai bešenas peske čixo, tai lenas anda čukaripe tai voja ando them la paračimengo pe kaver rig e zanaveska.Katka ramol jekh anav muršesko, kai si opral koslo. Kudo sas jekh vortako, kai sas les baro than ande kumpania, numa kai nasles e bax, numa pelo, bi-zjutimasko, tai musai sas te tradel dur. Kadia si kana avel o čorimos!Katka sai dikas ke variso nevo anklista ande lengo trajo.
Ramol ke, katar jekh vas zjuvliano, tai karandaso molivako: ” E romni”. Savi romni?—jo, kudia kai sas la e bari bunda tai o dragostoso mui, kai avel kadia miro, tai soha či nakel anda salono, numa lel o drom katar o kalidoro zji kai e soimaski soba. Tela lako anav ramol Doxhtoritsa L. Pe angluni data ramol katka jekh anav pe jekh niamo. Ramol ” Mamo”. Kudia si e sakra, kai či kamelas te mišajil le ternen, numa akana sas akardi te avel sigo, tai voi avel radoimasa , te šai zjutil.
Akana lelpe jekh baro ramomos ramome karandašosa vuneto tai lolo. O kher la bučako: E sloga mučisaili, vai jekh nevi trubul ande buči. Patika.HM! tuniaričil!Tudeskikompania. Katse vuzjaren o tud, te na len čixotka. Londeski lavka, masari etc. O kher lo grizime po telefono; kana nai e xazaika på tsan. Niči. Ke voi la ando than. O ramomos kai sas mai angle naštilas te djinel, ke leske jakha mukenas
bruma, sar kai trubul te kerdjol kudoleske kai lel te tasol ande maria, kana zumavelas te dikhel ando londo pai. Numa kotse ramolas: Le gropomaskobyrå. Kudo phenel sa!—Jekh mai baro tai jekh mai činoro, kašt. Tai ande jekh parantesa ramolas: anda puv. Pala kudo či mai ramolas kanči kotse! Getosailo pe puv; tai kadia vi si. La e galbeno hertija, čumidala tai toda la ande posoči le kolineski.
Ande dui minutsi naklo trajo duie beršengo. Vo nas perado, kana gelo avri; areves lesko šero sas vazdino, sar jekh raduime tai barimango manuš, ke vo zjangla ke leste sas o mai lašimos. Sodi čore gere soha nas len!
Översatt och inläst av modersmålsläraren Jonny Ivanovitch.G, george.tan@tele2.se